O autor

 

O escritor lucense Claudio Rodríguez Fer cultivou, en lingua galega, a poesía, a narrativa breve, a historia de vida e viaxe, o teatro, o guión cinematográfico e o ensaio, e, en lingua castelá, profesou o hispanismo. Reuniu a súa obra poética en Amores e clamores, a súa obra narrativa en Contos e descontos e boa parte da súa obra ensaística en Poesía galega e en Acometida atlántica.

Foi catedrático de ensinanza media en Galicia e profesor das Universidades da Cidade de Nova York, da Alta Bretaña en Rennes, da Bretaña Sur en Lorient e de Santiago de Compostela, onde actualmente é director da Cátedra Valente de Poesía e Estética e codirector da revista de investigación Moenia. Coordina con Carmen Blanco Unión Libre. Cadernos de vida e culturas, e promoveu a Asociación para a Dignificación das Vítimas do Fascismo. Así mesmo, dirixiu diversos congresos e encontros e participou en decenas de actas, enciclopedias e revistas europeas e americanas, e interveu publicamente en espazos culturais e universitarios de Europa, América e África.

Entre outros recoñecementos, no campo da poesía, recibiu o Premio da Crítica Española por Tigres de ternura; no campo da investigación, por dúas veces o Premio Losada Diéguez, respectivamente por Poesía galega e por A literatura galega durante a guerra civil; no campo académico, o Premio Extraordinario de Doutoramento da Universidade de Santiago de Compostela e o Doutoramento Honoris Causa da Universidade da Alta Bretaña en Rennes, e, no campo cívico, a Presidencia de Honra da Asociación Memoria do Exilio dos Republicanos Españois en Brest e o Premio Galiza Mártir pola Recuperación da Memoria Histórica da Fundación Alexandre Bóveda.

Tradutor de Emily Dickinson ao galego, foi traducido á sua vez a numerosos idiomas e obxecto dos libros Por un vocabulario galego do sexo. A terminoloxía erótica de Claudio Rodríguez Fer (1996) e O lume vital de Claudio Rodríguez Fer (1998), de Olga Novo, e Os mundos de Claudio Rodríguez Fer (1998) de Natalia Regueiro.

Ver a bibliografía de Claudio Rodríguez Fer

 

Claudio Rodríguez Fer, por Sara Lamas

Claudio Rodríguez Fer, por Sara Lamas